自己的飯盒像豬餿，
唯有貼一吓老公的飯盒。
(雖然飯餸很少，吾夫很可憐)
上圖其實有飯、蒜蓉肉片炒娃娃菜、泰式雞翼。
又，炒菜在飯盒很易出水，
所以，用焗爐紙摺一個小碗載著菜，
就不用全盒飯都水汪汪的了。
微波爐飯盒有一些東西要注意，
蔬菜類不能用菜心，菜心用微波爐翻熱後有陣臭味，
不能用易變黃的蔬菜，
最好用瓜類、豆類。
肉類最重要是全熟的，畢竟要放一段時間再吃，
半熟的會有細菌吧。
魚類我少煮，所以無建議。
建議還是有的，
盡量少骨，骨類在茶水間的垃圾桶很易發臭。
讓我再慢慢研究適合在香港帶飯的飯餸吧。
(日式的不太適合，畢竟人家習慣吃冷的，
而香港的Office實在太冷了，要吃熱飯)
(而微波翻熱的照燒鰻魚好像有點怪怪的…)
兩餸一湯之
青紅蘿蔔粟米豬展湯
及 節瓜淡菜仔湯
以上兩個湯都係可以當餸食，簡直係我嘅最愛。
青紅蘿蔔粟米豬展湯
豬展先齊水落汆水，汆完水洗一下。
青紅蘿蔔去皮滾刀切。
煲滾水，放兩片薑，水滾落青紅蘿蔔粟米蜜棗。
等水再滾就落豬展。
中火煲多30-40分鐘，飲得！
節瓜淡菜仔湯
節瓜去皮切片。
浸一下淡菜仔。
水連兩塊薑煲滾，水滾，落節瓜、淡菜仔，可以落埋肉片。
滾多15-20分鐘，就飲得！
以上兩個湯都係快靚正夏天湯水，
鄙人至愛！
豉椒炒青口
又係一個懶人餸。
青口喺百佳買，雪藏嘅
青紅燈籠椒各一
豆豉
辣椒
蒜頭
將上邊嘅材料炒埋一碟，成功😂
呢個做法仲易過白酒煮青口，
豆豉真係廚房嘅好幫手！
網民製產品清單 支持「香港製造」
尋日特首候選人曾俊華公佈政綱，當中有一項係「加強向外推銷『香港製造』這個品牌、發展多元旅遊」。
該項政綱流於口號式，點樣推銷呢？卻未有實質內容。但有網民，卻巧合地自己做咗一份「香港製造」產品清單，近日喺網上傳開⋯
今日講吓煲湯。
鄙人家中不時都有阿媽靚湯。
飲埋咁多，都會自己煲吓。
基本上煲老火湯都係四神做膽，
即係淮山、茨實、蓮子、雲苓。
再加肉，有啲甜味，
再加想要嘅料，
有時加陳皮、薑、蜜棗、無花果、紅棗。
今次加嘅係乾螺頭。
滋陰呀～
◆螺頭豬展湯
乾螺頭洗吓，浸發(我就預先一晚做)。
豬展齊水落，開慢火滾到出血水泡就閂火洗乾淨。
然後將所有料放晒入電子瓦罉。
煲到收工就飲得。
好懶，哈！
不過真係好味架！
自從生咗仔，我都習慣帶飯返工。
餵奶俾個仔嘛，食健康啲係應該嘅。
做咗阿媽，要為個仔負責任喇。
帶飯，又唔想排隊叮飯呢，
我就淘寶咗圖中呢個蒸飯盒。
十度良品。
係，香港係有得賣，連實惠都有，
嗰隻仲要係三層嘅，有計時有電子好高科技。
不過，我喺公司用啫，一層夠。
而且實惠呢，要百幾蚊一個。
我就決定要一個，最原始嘅，
最平版本。
淘寶連埋運費，另外再配返條英規嘅飯煲線，
圍返港紙80蚊有找。
btw我係用集運，所以平啲。
不過就煩啲囉，首先你要識集運。
用法，
將啲飯餸放入圖上嘅不銹鋼兜，
喺圖左下嘅位加水，
冚埋，好似圖右下咁，開制，
四個字啲飯餸就熱晒。
加幾多水就跟說明書啦。
好簡單嘅用法，可以由生餸蒸到熟，
可以由白米煮成粥。
我就蒸耐啲，蒸咗45分鐘。
中途加水。
無晒水佢會自動斷電的。
真係好方便，蒸飯神器，推薦！
唯一缺點係有少少聲，水滾咁聲，
水蒸氣唔多，放心。
祝大家有一餐美好的兩餸飯。
電子瓦罉，我估而家真係無乜人用，
又慢，又阻掟。
但識用，真係好好用。
我估佢應該係第一代slow cook，即係慢煮呀。
燜個牛肋，真係香出街。
無呃你，我燜落，去咗阿媽度食晏晝飯，再返屋企，
一出lift就聞到陣牛肉香味。
我嗰pack牛肋條呢，唔係貴嘢，
只係百佳超值牌雪藏貨。
燜起，勁冧勁入味。
★蕃茄燜牛肋條
材料：(全部喺百佳買，打風嗰日買嘅)
牛肋條
蕃茄
洋蔥
西芹
甘荀
調味：
鹽
蕃茄醬
冰糖
山楂餅
做法：
1. 牛肋條解凍切大件
2. 蕃茄切件，甘荀滾刀切，西芹斜切，洋蔥切大塊
3. 全部材料放入電子瓦罉
4. 全部調味料放入電子瓦罉
5. 加少少水(1碗左右)
6. 開高火燜3個鐘轉慢火再燜3個鐘，食得。如果無出咗街無時間轉火，就8個鐘慢火啦。
有時古董做出嚟嘅菜，係有驚喜嘅。
啲牛肋係有肉汁得嚟又勁冧架！
今日無兩餸飯，只有單餸意粉。
仲要係用中式鑊煮嗰隻。
你無睇錯，係，中式鑊。
方便丫嘛，平底鑊咁細隻。
★香草雞扒意
材料：
雞扒(百佳雪藏嗰啲)
蕃茄(百佳有售)
洋蔥(百佳有售)
甘荀(百佳有售)
意粉(百佳有售)
調味：
鹽、香草(什錦香草一瓶過嗰啲)、砂糖、豉油、粟粉、廚酒、白胡椒粉、油
做法：
1. 雞扒解凍，用鹽、油、豉油、白胡椒粉、廚酒、粟粉醃咗佢。
2. 煲滾水加少少鹽，水滾落意粉，跟包裝指示煲返7分鐘，之後閂火焗冧佢。
3. 蕃茄切件、洋蔥切粒、甘荀切條。
4. 開火燒熱隻鑊落油，然後落洋蔥快手炒，再落雞扒，有皮嗰面向下，加少少水冚蓋燜煮。
5. 趁啲雞扒未熟，洗吓啲用咗嘅食物盒。
6. 洗完食物盒就開鑊蓋，翻吓啲雞扒。
7. 雞扒熟就兜起，落餘下嘅蕃茄同甘荀，同洋蔥一齊再煮。煮熟再將雞扒翻落鑊再炒。
8. 加砂糖、鹽，閂火落香草。
9. 將煲內的意粉夾起放入碟，盛起雞扒，食得。
講真，我覺得即煮意粉係慢過煮中餐。以上咁煮呢，因為有汁，所以乜嘢意粉醬都唔使落，調味份量自己控制，想食健康意粉的話，咁煮係OK嘅！
祝大家有一餐美好嘅意粉。雄性這種動物，不論是如何愛好和平也好，從心底裡還是有一股原始的慾望，透過擊敗對手，為此吸引雌性生物，滿足自我的英雄感。所以男人有很多 戰場，有酒吧、有廁所，還有餐廳。這些年十分流行的一句網絡說話叫「男人的浪漫-豆腐火腩飯」，除此之外，今天介紹一個只屬於男人的戰場，兩餸飯。
若 果茶餐廳是香港其中一個最有香港代表性的食肆，兩餸飯便是最有獅子山精神的餐廳。我們是香港人，我們素來的品質都是凡事快，快和快，明買明賣，不需要做 作。兩餸飯店，所有的食物已經放在玻璃櫃台之內，有什麼選擇，一目瞭然:蒸魚、蒸水蛋、魚香茄子、蒜蓉白菜、咖哩雞、菜心牛肉…店裡不賣服務，不賣裝潢， 在這裡，餐牌也變得不夠形象化，吃什麼就憑自己的雙眼來決定；到底選擇叉燒炒蛋還是火腿水蛋? 咕嚕肉或是椒鹽豬排?到底會否選錯?這個決定，足以影響一整頓飯；但你選擇的時間只有三秒。由你開聲說出一句兩餸飯開始，店裡的中年女性店員會立即在飯壺 裡用飯勺盛起白飯到盤上，再轉身問你要什麼餸，整個程序，只有三秒。
當 你把晚餐放到桌子上，真正的戰爭才開始。一張桌子，四張沒有背靠的圓型椅子，不少於八個的餸菜。四個陌生男子，大家上各自各的吃飯，除了咀嚼聲外，表面是 相當平靜。其實，每個人都不禁用眼偷偷的瞄了其他三人一下，飯的數量不及我，敗陣!選擇的餸菜不夠多肉，娘娘腔!吃得這麼慢，失敗中的失敗。在這個短短十 分鐘的四方城內，每個人都在挑戰其他人，即使你不想應戰，你對面的人仍然會視你為假想敵。
由你付錢，到離開，過程也不會超過十五分鐘；這一頓飯，最令人痛快的除了遇到一個不論速度還是份量都旗鼓相當的對手之外，就是二人一同踏出餐廳一刻，二人輕輕的一個點頭，你就明白，這是一個「識英雄，重英雄」的英雄地。崖夕黑語:有些東西，習慣了就好
崖夕，中國青年，人稱三尻先生，
宣揚做尻事，說尻話，傳尻心
希望大家返工生活之餘，可以望一望呢個世界
其實都幾好笑
https://www.tumblr.com/blog/ugniy
Email: ugniy@hotmail.com
Facebook:https://www.facebook.com/ngaisiew請即投稿，成為讀行俠一員：https://hkwriterhub.tumblr.com/submit
讀行俠Facebook專頁︰Click Here
吾外子，每日都被選擇食兩餸飯。
外食餐桌上可能如文中所言能找到識英雄重英雄的對手，這是男人的浪漫。
而家中餐桌上，沒有競爭對手，
只有收工之後啱啱煮完飯攰到PK嘅黃面婆一個。
仲有一個食灼菜芯都好滋味嘅BB仔。
唔知佢一邊食兩餸飯，一邊點諗。
可能只會諗，一陣要洗碗呀……
又，感謝大學飯堂，俾咗我唔少啟發。
是日打風。
家中無乜儲糧，應該話係無菜，只有肉。
好在住得阿媽近，可以擄劫啲菜返家。
係，同樣身為娘親，我阿媽比我更有遠見。
是日兩餸飯係灼白菜同臘腸冬菇飯。
仲有娘親嘅愛心肉骨茶。
★臘腸冬菇飯
材料：
臘腸(榮華啦，不過今晚嘅臘腸係我老爺喺英國買回來的，其實唔係煮飯嘅用途，不過一貫我嘅作風，煮得就煮，其實好好味！)
冬菇(藥材舖買)
蝦米(樓上買)
乾瑤柱(樓上買)
白米(超市買，係我知道糯米好味啲，不過我家無，就用白米啦)
冬菜(街市雜貨舖，不過打風無得買，我家又無，就唔落啦)
調味：
甜豉油，不過我無落
做法：
1. 將所有材料浸軟，切碎。浸瑤柱同蝦米的水可以留嚟煮飯。
2. 洗米，放喺電飯煲煮飯，落埋蝦米瑤柱同浸蝦米瑤柱水。
3. 等飯滾，落埋冬菇臘腸冬菜。繼續煮。
4. 食得。可以落埋甜豉油。
呢味飯除咗要勁浸材料同切粒之外，真係無技巧可言。好快食得👍
★灼白菜
同尋日個灼菜芯一樣。食得。
★肉骨茶
首先，你要有一位會煮肉骨茶的媽媽。
然後，同佢講你想飲。
咁就有得飲。
祝大家有一餐美好的兩餸飯。
身為一個煮兩餸飯嘅媽咪，我個仔，都係被迫食兩餸粥。
唔知佢長大後點樣面對學校嘅兩餸飯。
BeTWeen, 應該係btw, 介紹返，
我個仔，一個很平凡嘅8個月大BB，啱啱出牙仔。
呢款粥仔我係用Panasonic嗰隻PE45高速煲煮嘅。
即係匯豐呢，信用卡積分換嗰隻細煲，
4人家庭啱啱好。
煲粥夠綿，好方便。
呢次重點係懶人使用高速煲法。
兩餸粥唔係重點。
有關淮山……
順帶一提，鮮淮山喺街市買，
我喺百佳搵唔到，淨係得牛蒡。
唔知惠康有無，我無去深究，
反正街市有好多，又唔貴。
淮山同牛蒡個樣有啲似，唔好買錯。
煲BB粥仔用20cm咁長就夠，
多咗嗰啲唔好刨皮，可以放好多日。
刨皮會令手好痕，記得戴手套。
★淮山瘦肉粥
材料：
手套(藥房買平過超市買，去淮山皮用)
鮮淮山(街市菜檔)
瘦肉切片(街市肉枱，唔好買免治)
米半杯(我食開金鳳，超市同糧油舖差唔多價錢)
調味：
無，除非用少少鹽醃吓啲瘦肉。據說BB仔腎未發育完成，唔好食調味。
做法：
1. 洗米，用高速煲嘅好處係，唔使浸米唔使雪米，啲粥依然會好綿好爛。
2. 放啲米入高速煲，冚好個蓋，唔好上鎖唔好放閥門，照按煲粥個制，開始。
3. 咁個煲會照樣發熱，喺呢個時候，刨淮山皮同切細片，仲有切肉片。主圖係我一早預備好影相，所以唔好話我唔跟次序。
4. 以上工序需時5分鐘左右，呢個時候煲粥應該滾滾哋，係時候打開煲蓋，落晒啲淮山瘦肉。
5. 然後記得冚返實個蓋，上鎖同放好個閥門。咁個煲就會自己繼續煲粥，自動繼續增壓減壓程序。
咁點解唔一早放晒啲料呢？
我覺得滾水落料啲粥無咁混濁，好味啲咁囉。
煲完啲淮山同瘦肉好冧，可以壓爛俾BB食。
好喇阿B，係時候食兩餸粥。
繼續兩餸飯。
要喺收工後極速食得，其實我係前一晚整定啲餸放雪櫃，拎出嚟蒸or炒就OK。
今日個肉餅，就係咁樣整。
是日兩餸一湯：菜脯冬菇蒸肉餅、淥油菜、鱷魚肉煲海底椰湯。
★菜脯冬菇蒸肉餅
材料：
菜脯(超市買)
冬菇(藥材舖買)
免治瘦肉(街市肉枱)
調味：
油、鹽、粟粉、砂糖、廚酒、豉油
做法：
1. 浸軟啲冬菇，去蒂，切粒。
2. 菜脯沖吓水，我唔想太重味。其實菜脯應該係炒蛋的，馬碲or梅菜先係蒸肉餅，但我忘記買馬碲同梅菜，屋企又有包菜脯，所以，將就吓啦，有咩就用咩係我嘅宗旨。但我絕對唔會泡菜蒸肉餅嘅放心。
3. 將以上嘅冬菇粒同菜脯粒，混合免治肉碎同啲調味料。我就係一邊喺砧板硺一邊加少少水一邊混合。
4. 放入雪櫃一晚，第二日收工就拎出嚟放喺飯煲，一邊煮飯一邊蒸。食得。
★淥菜芯
材料：
菜芯(街市菜檔買)
薑(都係街市菜檔買)
做法：
1. 薑切片，煲滾水
2. 落少少油
3. 落薑片，落菜芯
4. 撈返起上碟食得。
如果太淡可以食時加豉油。我覺得我連淥菜芯都寫到食譜，好叻。
★鱷魚肉煲海底椰湯
材料：
乾鱷魚肉(深水埗合昌買)
豬展(肉枱買)
乾海底椰(深水埗合昌買)
淮山(藥材舖買)
蓮子(藥材舖買)
茨實(藥材舖買)
茯苓卷(藥材舖買)
蜜棗1粒(藥材舖買)
調味：
鹽
做法：
1. 返工前攞個電子瓦罉出嚟，係，30年前伊瑪牌嗰隻橙色身嗰隻電子瓦罉。高火先得嗰150W嗰隻，煲湯要8至9個鐘嗰隻。
2. 用一個不銹鋼煲，凍水落豬展，慢火煲到出晒泡，水滾一陣就可以撈起，用冷水沖吓。
3. 將所有材料及半熟豬展掉晒入個電子瓦罉度，加1000ml清水。
4. 開著高火。如果家中有人，就4小時後轉低火，如果無人，就落多少少水繼續高火。
5. 收工返屋企，閂火落鹽飲得。水份蒸發好少，所以2個人飲，1公升水等於4碗很足夠。
祝大家有一餐美好嘅兩餸飯。
最近要練習自己煮食。
(以往都是回娘家吃飯，哈哈哈，但孩子逐漸長大，為娘都該自己負責飲食了。)
暫時家中兩個大人一個BB，兩餸飯夠兩個大人食。
一般我都是7點至7點半回到家中，
我習慣8點鐘就吃飯。
要在8點鐘可以開飯，
必須準備兩道簡單，又有菜有肉的餸。
以下是我的小實驗飯餸。
★冬菇雲耳蒸雞脾
材料：
冬菇(藥材舖買的)
雲耳(藥材舖買的)
雞全脾(百佳買的)
薑(街市菜檔買的)
調味：
鹽、油、粟粉、廚酒、胡椒粉、豉油、砂糖
做法：
1. 冬菇雲耳浸軟，如果趕時間可以用熱水浸，切成條狀。
2. 雞全脾斬件去肥膏，可以留返少少皮，然後用上述調味料撈埋佢，至於調味料份量就係「少許」，即係隨便落啲啦，如果唔知幾多，就好似點一條薯條嘅茄汁咁多啦。即係呢，如果你食薯條要好多汁，咁我相信你食濃味嘢，咪落多啲調味囉。
3. 薑切條狀，去唔去皮無所謂，唔去皮咪洗乾淨啲皮囉。薑皮中和返無咁燥熱，寶嚟嘅。
4. 上述嘅嘢撈埋一堆，放入雪櫃雪一晚，第二日放工返屋企拎出嚟蒸15分鐘，搞掂。
★蝦米粉絲炒節瓜
材料：
蝦米(樓上買嘅)
粉絲(759買嘅)
肉片(街市廣南行肉枱買嘅)
節瓜(街市菜檔買嘅)
薑(街市菜檔買嘅)
蒜(街市菜檔買嘅)
調味：
油、鹽、砂糖、粟粉、蠔油、水
做法：
1. 浸軟啲粉絲，又係如果趕時間用熱水啦，剪斷佢。浸軟啲蝦米。
2. 節瓜去皮切段再切條狀。
3. 肉片我家多數有一碗仔用油鹽豉油醃好的。
4. 薑切片，蒜切碎。
5. 開火落油，出煙就落啲蝦米爆香佢，兜起。
6. 落薑同蒜爆香佢。
7. 落肉片炒到半熟。
8. 落瓜，落小半碗水，冚鑊蓋。
9. 將鹽、砂糖、粟粉、蠔油、小半碗水撈埋。
10. 趁啲瓜未熟就洗吓用咗嘅食物盒。
11. 開鑊蓋，落埋啲蝦米，再炒。
12. 落第9項準備嘅調味。再炒兩吓。
13. 落埋粉絲。再炒。呢個時候你會發現，粉絲好吸水。
14. 炒多陣就開始乾水，閂火上碟。
以上係用不銹鋼鑊or生鐵鑊嘅，我覺得收水易過平底鑊。
兩個餸可以同時進行，半個鐘一定食得。祝大家有一餐美好嘅兩餸飯。
in average
are photos
are videos
are texts
are gifs
are audio